Пра нас

Часопіс створаны ў 1987 г. як штомесячнае навуковае і метадычнае выданне для настаўнікаў беларускай мовы і літаратуры. Пачаў выходзіць у студзені 1988 г. Першапачатковая назва – “Беларуская мова і літаратура ў школе”, у 1992 г. перарэгістраваны як “Роднае слова”. З 1 ліпеня 2001 г. рэдакцыя часопіса дзейнічае самастойна як Установа «Рэдакцыя часопіса “Роднае слова”».

“Роднае слова” – сацыяльна значнае выданне Рэспублікі Беларусь, на старонках якога друкуюцца літаратурна-крытычныя матэрыялы пра творчасць знакамітых айчынных і замежных пісьменнікаў; мовазнаўчыя даследаванні па гісторыі беларускай мовы, функцыянаванні яе ў сучасным грамадстве; адлюстроўваюцца вопыт і дасягненні педагогаў краіны; друкуюцца матэрыялы для падрыхтоўкі да алімпіяд па беларускай мове і літаратуры, цэнтралізаванага тэсціравання. У часопісе змешчаны навукова-папулярныя артыкулы пра нацыянальную і сусветную культуру (тэатральнае і кінамастацтва, гісторыя архітэктурнага, выяўленчага і музычнага мастацтва, фальклорныя традыцыі беларускага народа і народаў свету, матэрыялы пра экспазіцыі рэспубліканскіх музеяў); матэрыялы краязнаўчай тэматыкі, з гісторыі старажытных беларускіх родаў, якія спрыяюць патрыятычнаму і ідэалагічнаму выхаванню моладзі.

Матэрыялы ў часопіс падбіраюцца ў адпаведнасці з беларускай дзяржаўнай ідэалогіяй, прыярытэтамі нацыянальнай адукацыі і культуры, з улікам вучэбных праграм па беларускай мове і літаратуры для ўстаноў агульнай сярэдняй адукацыі, каляндарна-тэматычным планаваннем, паводле календара адметных датаў і падзей Беларускага дзяржаўнага архіва-музея літаратуры і мастацтва.

Часопіс належыць да тых перыядычных беларускамоўных выданняў гуманітарна-асветніцкага кірунку, якія істотна дапамагаюць у станаўленні нацыянальнай самасвядомасці, далучэнні маладога пакалення да беларускай і сусветнай духоўна-культурнай спадчыны.

Часопіс “Роднае слова” ўключаны ў Пералік навуковых выданняў Вышэйшай атэстацыйнай камісіі Рэспублікі Беларусь для друкавання вынікаў дысертацыйных даследаванняў па філалагічных навуках, мастацтвазнаўстве, культуралогіі, педагогіцы (тэорыя і методыка навучання беларускай мове і літаратуры).

Па выніках рэйтынгавай адзнакі навуковых выданняў, якія ўваходзяць у Пералік Вышэйшай атэстацыйнай камісіі Рэспублікі Беларусь (Дадатак да рашэння калегіі ВАК Рэспублікі Беларусь ад 11 снежня 2015 г.), часопіс “Роднае слова” заняў 4-е месца з 22 навуковых выданняў па навуковым накірунку “Літаратуразнаўства”, 4-е месца з 19 выданняў па “Мовазнаўстве”, 6-е месца з 15 па “Мастацтвазнаўстве і культуралогіі” і 16-е з 45 па “Педагагічных навуках”. Гэта паказчык запатрабаванасці “Роднага слова”, яго значнасці ў адукацыйнай прасторы краіны.

Аўтары і чытачы часопіса “Роднае слова” – вядомыя вучоныя, а таксама аспіранты і дактаранты Беларусі і замежжа (Украіны, Балгарыі, Славакіі, Кітая), выкладчыкі ВНУ, настаўнікі гімназій, ліцэяў, школ, бібліятэкары, супрацоўнікі музейных устаноў і інш.

У сакавіку 2014 г. установа атрымала пасведчанне аб дзяржаўнай рэгістрацыі ў якасці выдаўца, вытворцы і распаўсюджвальніка друкаваных выданняў на права здзяйснення выдавецкай дзейнасці навуковых, навукова-папулярных, вучэбных, літаратурна-мастацкіх, даведачных, выданняў для вольнага часу. Зарэгістраваны ў Дзяржаўным рэестры выдаўцоў, вытворцаў і распаўсюджвальнікаў друкаваных выданняў Рэспублікі Беларусь за № 1/219 (з кастрычніка 2010 г. дзейнічаў спецыяльны дазвол (ліцэнзія) № 02330/0630706 на выдавецкую дзейнасць).

У жніўні 2019 г. часопіс “Роднае слова” ўвайшоў у склад РУП «Выдавецтва “Адукацыя і выхаванне”», дзе мы і далей будзем рыхтаваць для вас наша навуковае і метадычнае выданне.

Установай «Рэдакцыя часопіса “Роднае слова”» выдадзены кнігі:

«Я – сын Ваш: Статкевічы, Сацкевічы-Статкевічы герба “Касцеша”. Карафа-Корбуты герба “Корчак”» А. Статкевіча-Чабаганава;
«Я – сын Ваш: Некрашэвічы герба “Любіч”. Татуры герба “Данброва” Кернажыцкія герба “Юноша”. Маствіловічы “Даленга”» А. Статкевіча-Чабаганава;
“Янка Купала ў Славакіі” М. Труса;
“І прызванне, і лёс: жыццё і дзейнасць вучонага-педагога прафесара Фамы Антонавіча Бельскага” А. Бельскага;
ілюстраваны альбом “Маляваныя сны Паўла Марціновіча” (уклад. А. Статкевіч-Чабаганаў);
даведачанае выданне “Беларускія пісьменнікі на старонках часопіса “Роднае слова” (2008 – 2012 гг.)” (уклад. А. Канановіч [і інш.]);
“Фёдар Піскуноў. Мова як сістэма” (уклад. К.Ф. Піскуноў, К.М. Пучынская);
“Тут іх карані і вытокі: вядомыя людзі з Капыльшчыны ў свеце” А. Бельскага;
“Беларуская мова: тэсты” Л.І. Пшанічнай;
паэтычны зборнік “Малюся зорам” З. Падліпскай.

Паспяховая дзейнасць калектыву часопіса адзначана шэрагам дыпломаў і грамат, сярод якіх:

Дыплом удзельніка ХІІ Міжнароднай спецыялізаванай выставы “СМІ ў Беларусі” (2008);
Дыплом лаўрэата ІV Нацыянальнага конкурсу друкаваных сродкаў масавай інфармацыі “Золотая Литера” ў намінацыі “Лепшы навуковы, навукова-папулярны часопіс” (2008);
Дыплом Саюза пісьменнікаў Беларусі (2008);
Дыплом удзельніка ХІV Міжнароднай спецыялізаванай выставы “СМІ ў Беларусі” (2010);
Дыплом лаўрэата VI Нацыянальнага конкурсу друкаваных сродкаў масавай інфармацыі “Золотая Литера” ў намінацыі “Лепшыя матэрыялы навуковай і навукова-папулярнай тэматыкі” (2010);
Дыплом лаўрэата VIІІ Нацыянальнага конкурсу друкаваных сродкаў масавай інфармацыі “Золотая Литера” ў намінацыі “Лепшыя матэрыялы навуковай і навукова-папулярнай тэматыкі” (2012);
Грамата Інстытута журналістыкі Беларускага дзяржаўнага ўніверсітэта (2013);
Грамата Міністэрства культуры Рэспублікі Беларусь (2013);
Дыплом Міністэрства адукацыі Рэспублікі Беларусь за ўдзел у ХV Рэспубліканскай выставе навукова-метадычнай літаратуры, педагагічнага вопыту і творчасці навучэнскай моладзі “Я – грамадзянін Беларусі” (2013);
Дыплом Міністэрства адукацыі Рэспублікі Беларусь за ўдзел у ХVІ Рэспубліканскай выставе навукова-метадычнай літаратуры, педагагічнага вопыту і творчасці навучэнскай моладзі (2015);
Падзяка філалагічнага факультэта БДУ (2016);
Падзяка выдавецтва “Адукацыя і выхаванне”, часопіса “Беларуская мова і літаратура” (2016).