360.jpg "Часопіс “Роднае слова”")
2 чэрвеня 2022 г. а 17-й гадзіне ў Дзяржаўным літаратурна-мемарыяльным музеі Якуба Коласа часопіс “Роднае слова” прэзентуе публікацыі нумара-альманаха, прымеркаванага да 140-годдзя Янкі Маўра, якія выяўляюць актуальны педагагічна-выхаваўчы патэнцыял твораў пісьменніка і іх увасаблення ў іншых відах мастацтва, разглядаюць стратэгіі асэнсавання чытання як важны складнік выхавання асобы і яе сацыялізацыі, прапануюць сучасныя формы працы з дзецьмі (інтэлектуальныя гульні, літаратурныя квэсты і інш.).
Прэзентацыя ў фармаце круглага стала “Яго свет належыць дзецям” пройдзе ў межах Фестывалю дзіцячай кнігі “Міхасёвы прыгоды” і прысвечана Міжнароднаму дню абароны дзяцей.
Урачыстасці, прымеркаваныя да 140-годдзя з дня нараджэння Янкі Маўра, працягваюцца. Адной з іх стала ўзнагароджанне пераможцаў конкурсу, які называўся “Янка Маўр: вандраванне па зорках”.
У конкурсе, абвешчаным Дзяржаўным музеем гісторыі беларускай літаратуры, галоўным упраўленнем па адукацыі Мінскага абласнога выканаўчага камітэта, Мінскім абласным аддзяленнем грамадскага аб’яднання “Саюз пісьменнікаў Беларусі”, удзельнічалі навучэнцы ўстаноў агульнай сярэдняй, дадатковай адукацыі дзяцей і моладзі Мінскай вобласці.
У Дзяржаўным літаратурна-мемарыяльным музеі Якуба Коласа працуе часовая экспазіцыя друкаваных выданняў “Перабытых часаў ніць”. Сярод іх – унікальныя асобнікі з так званага кола чытання паэта, якія датуюцца канцом XIX – пачаткам XX ст., рэдкія часопісы 1920–1930 гг. з яго асабістай бібліятэкі, нумары, якія прысвячаліся юбілейным датам, выданні з падпіскі Якуба Коласа.
А завяршаецца выстава асобнікамі “Роднага слова” і, па храналогіі, нашым нумарам-альманахам, які выйшаў у мінулым годзе да 140-годдзя паэта.
Неардынарны настаўнік, які стаў знакамітым пісьменнікам.
Пачынальнік айчыннай дзіцячай літаратуры, чые фантастычныя і прыгодніцкія творы на гады апярэдзілі славутыя сюжэты А. дэ Сент-Экзюперы і А. Гайдара.
Творца, які валодаў дарам мастацкага прадбачання і першым апісаў… дыстанцыйную лекцыю…
“Роднае слова” працягвае традыцыю нумароў-альманахаў, прысвечаных вызначальным постацям беларускай літаратуры. Наш майскі нумар абавязкова здзівіць вас, прымусіць усміхнуцца і не аднойчы прамовіць: “А я і не ведаў!..”
Яго герой – Янка Маўр.
Толькі ў “Родным слове” – унікальныя даследаванні і практычныя матэрыялы:
- сакрэт мастацкага прадбачання Янкі Маўра;
- “шпацыр” па мінскіх адрасах пісьменніка;
- “альбом” сяброўскіх шаржаў;
- кінаўвасабленне творчасці;
- гісторыя музейнага экспаната;
- інтэлектуальныя гульні, літаратурныя квэсты і многае іншае.
Падпіска:
• на сайце часопіса да 19 красавіка
• у аддзяленнях Белпошты і Белдруку да 26 красавіка
• на сайце Белпошты
• электронная копія на сайце часопіса
Падрабязна
«“Сумоўя аснова – жывое слова…”: Феномен навукова-асветніцкай традыцыі часопіса “Роднага слова”». Пад такой назвай у Нацыянальнай бібліятэцы Беларусі 3 сакавіка адбыўся ўрачысты круглы стол, прымеркаваны да 35-годдзя з дня выхаду ў свет навуковага і метадычнага часопіса “Роднае слова”. У мерапрыемстве, скіраваным на асэнсаванне адметнай ролі выдання ў культурнай прасторы сучаснай Беларусі, узялі ўдзел прадстаўнікі навуковай і літаратурна-выдавецкай грамадскасці.
Гісторыя “Роднага слова” багатая на славутыя імёны суайчыннікаў: падчас круглага стала экспанаваліся ўнікальныя аўтографы-прысвячэнні часопісу класікаў беларускага прыгожага пісьменства.
Падрабязна
24 лютага адбылося ўрачыстае ўзнагароджанне пераможцаў конкурсу эсэ “Адрасы роднага слова”, які праводзіўся да Года гістарычнай памяці па ініцыятыве часопіса “Роднае слова” і газеты “Літаратура і мастацтва” пры падтрымцы выдавецтва “Адукацыя і выхаванне” і Саюза пісьменнікаў Беларусі. Праведзены конкурс быў прымеркаваны да юбілейных датаў перыядычных выданняў, якія займаюць значнае месца ў культурна-асветніцкай прасторы сучаснай Беларусі: 35-годдзя з дня заснавання навуковага і метадычнага часопіса “Роднае слова”, 90-годдзя – літаратурнай газеты “Літаратура і мастацтва” і 100-годдзя – літаратурна-мастацкага і грамадска-палітычнага часопіса “Полымя”.
Ты ад маці, ты матчына,
Беларуская мова.
Зорамі растлумачана
Сэрцу кожнае слова.
Ты як раніца шчырая,
Маеш цёплыя рукі.
І вяртаюцца выраі –
Толькі б чуць твае гукі.
Там, дзе ёсць ты, – пагоднее,
Дзе няма – там зімова.
Будзь для ўдзячных паходняю,
Беларуска мова!
Аўтограф народнага паэта Беларусі Рыгора Барадуліна з архіва часопіса “Роднае слова” (1993).
Са святам, сябры!
